- 71 -

1381. März 17.

In gotis namen amen. Wyr Elka vnd Agnes von gotis gnodin des dirleuctin förstin Herczoge Nicklos czu Troppaw vnd czu Rathebor töchtir vnd in der Juncvrauen Klostir czu Rathebor sinte Dominicus ordins Wir bekennyn öffenlich an disem kegenwortigen brywe allyn den dye yn werdyn sehen adir hörin lesin nv vnd ewiklich: Das Swestir Elisabeth Crokayerynne vor vns komen ist vnd czu vns laube gebetin hat das wir yr gündin czu käufin vndir vnserm gebiete etliche gartin. Des habe wir angesehen yren getrauwen dynst vnd habin yr des gegunst mit gutym willen vnd myt wolbedochtym muete. Des hat sye gekauft off vnserem gebite Sechs gartin vor der Stat czu Rathebor also man aus der Stat get czu dem neuwen Tore in dye lange gasse off dye lynke hant in der walt gassin: den erstyn gartin den hat sye gekauft vmme sextehalbe mark grosschin polenisscher czal: widir Heynrich Habirdorff: Vnde der selbe garte behelt in ym eynen halbin morgin: vnde do von gibit man czu Czynse fünfczen scot grosschin: Den andirn Gartin von der egesprochin walt gassin in der Langen gassin hat sye gekauft widir Hannus der Goetfridynnen an eynen fyrdunk vmme czehen mark: vnd der behelt eynen ganczyn morgin: vnde do von gefeit czu czynse andirhalbe mark: vnde derselbe Czins des eynen gartyn der ist halp Swester Offkyn Walterynnen Pryorynnen czu den geczeiten in dem vorgesprochin Jvncvrauwen klostir. Dornoch an der selbin seyten von der walt gassin der fierde garte den hat sye gekauft widir Petir Smyt vmme syben mark: vnd der behelt an eyn firteil eynen ganczyn morgyn: vnde do von gefeit czu czynse drey fierdunge. Czu neheste dem selbin gartin leit eyn garte: den hat sye gekauft widir Reichil Sneyder vmme czwelf mark vnd vmme neun scot. vnd der selbe garte behelt niecht follyn andirhalbin mörgin: do von czinsit man des Jaris eyn schok Grosschin. In der selbin langen gassin an der andirn seyten also man aus der vorgesprochin Stat get off dy rechte hant der Sybende garte den hat sye gekauft widir Nycklos Meyer vmme fünf mark: vnd der behelt eynen halbin morgin, do von czinsit man des Joris eyn halbe mark. Den sechstyn gartyn hat sye gekauft widyr Jon Pauker vmme firdehalbe mark vnd der ist gelegyn auch vor der Stat czu Rathebor vnd in vnserem gebite in dem Proswynkil bey dem hoppegartyn. vnde do von czinsit man czehen scot: Auch so hat sye andirhalbe mark Czinsis: aus dem Czinse des do ist funfczen mark: den das Conuent vnd auch Swesstir Elisabet gekauft hat off der Stat czu Rathebor adir off eynen wydirkauf. Dy vorbeschribenen sechs gartin vnd gülde hat dye egenante Swestir Elisabet gekauft mit unsir gunst vnd myt laube vnsir Pryorynne vnde des ganczyn Conuents. also das sye der offtbeschribenen gärtyn vnd Czynse vnd aliis noczczes dye do von bekomen mögyn: der sol sy gebruchyn vnd genyesen czu yrem leibe noch yrem willen domyte czu tun vnd czu lossyn noch yrer gewissen abir ynnewenyg des Ordyns vnd niecht auswenyg. Wenne wir denne alle tötlich sint vnde das got öbir sye gebeut: so söllin dye egeschribenen gartyn vnd giilde myt allyn genyesen gefallyn an das Conuent. Abir myt zölchir vndirscheit also das dye Pryorynne dye nv ist adir hernoch wirt seyn myt den eldisten dreyen Swestirn zöllyn sich allir der sachyn vndirwyndyn leutirlich dörch got. vnd söllyn den Czyns alle Jor infordyrn vnd offhebyn Vnd wer das das keyn vngelucke adir schade des got niecht engebe an den selbyn vorbeschribenen gärtyn geschege. von feuyeres wegyn eygenem adir fremdem: adir von wassirs: adir von örleyge: adir von andirn sachin schadehaftigen do von dy gartyn möchtyn czurgen: das söllyn dy Pryorynne vnde dye drey Eldisten Swestirn niecht gestattyn: zvndir sye söllyn czu foraus von dem Czynse der von den gartyn gefeit bessyrn vnd widir bauwen was doran gebrechins wirt seyn: also das dye icht czurgen adir vorterbyn: zvndir das sy ewyklich zollyn volgank habyn. Vnd wenne denne sich dy Pryorynne myt den dreyen eldisten Swestirn des czynses vndirwynden alz vor gesprochin ist: zo zöllyn sye von dem selbin Czynse dem Conuent gebyn alle Jor Jerlich czwu mark grosschin Polenysschir czal: dor noch czwu mark czu des klostirs kyrchen czu besseryn messegewant: czu weyne vnd czu allir nottorft der kyrchen: vnd vor dy fünfte mark zöllyn sye nach Swestir Elisabet tode alle yor Jerlich czu fir czeyten yn dem Jore lossyn lesyn eynen brudir dreisig zelmessyn czu troste yrer zelyn vnd allyn den von den das ye bekomen ist. Dye oberigen nevnczen scot des Czynses zöllyn sy gebyn Swestir Osannen Jekyls Klofyes tochtir von Crokaw in dem oftgenanten klostir czu yrem leybe: vnd wenne got öbir sye gebeut das sye dy egenante Swestir Osanne von dyser werlt vorscheydit: zo züllen dye vorgeschrybenen neun scot gefallyn auch an das Conuent.
Das alle dye vorbeschribenen sachyn vnd zelgerete stetyn vnd ganczyn volgank zöllyn habyn ewyklich Des czu eyner ewygen bestetygunge vnd bekentnys habe wyr egenantyn Herczogynnen Elka vnd Agnes myt der Pryorynne vnd des Conuentis vnsir Ingesigel an dysen kegynwortigen bryff losyn hengyn Der do gegebyn ist noch gotis gebürte thausynt Jor dreyhundirt Jor vnd yn dem eyn vnd Achczigsten Jore an dem dritten Suntage in der fastyn alz man syngyt Oculi: Vnd des allis sint geczeuk Nyckel Richter aus den Neuwen gartyn: Lorencz: Petyr: Hannus habirdorf: Petyr Hannus Zon: Hannus Staenyczer: Nyckel: Jekyl: alle scheppyn aus den vorgesprochin Neuwen gartin: vnd andir vil erber leute.

Anhangend 8 Siegel in dunklem Wachs, 1) elliptisch das Conventsiegel, Gott der Vater ein Crucifix haltend, mit der Umschrift: S CONVENTVS. SORORVM IN RATIBOR. ORD. PREDICA. 2) rund, eine Auferstehung mit der Umschrift: S. ELYSABET. DI. GR. DVCISSE. CLAVST. RATIBOR. 3) rund, Verkündigung mit einer kleinen knieenden Figur darunter, mit undeutlicher Umschrift: s . . . . ducisse agnetis . . . . . . .

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 2, Urkunden der Klöster Rauden und Himmelwitz, der Dominicaner und Dominicanerinnen in der Stadt Ratibor. Hrsg von dr. W. Wattenbach, Breslau 1859.